书展2024将于7月17至23日举行，好多家长已经睇定有咩优惠，谂定要买咩书，希望打造一个爱阅读嘅孩子。但就算买到间屋变咗图书馆，有几多个家庭培养到爱阅读嘅小朋友？咁究竟点样令孩子真正爱上阅读呢？我要讲讲自己嘅𤓓爆经历。

幼稚园举办故事爸妈活动

话说大仔一两岁开始，我奉老婆大人之命每晚同阿仔亲子阅读，谂返起嚟场面都好温馨。到大仔读幼稚园，学校邀请家长返学校讲故事，以我多年亲子阅读经验梗系无问题，easy job！

嗰日朝早，我一早嚟到学校礼堂坐低，先发现原来现场仲有四、五个父母。各位家长坐喺不同角落，小朋友可以自己拣去边度听故事。正当我跟足故事书一句一句读畀小朋友听，点知眼前五、六个小朋友无反应不得止，仲陆续离开，突然之间我面前无晒人！我四围望望，发现远处一个角落逼满小朋友，行近见到有个爸爸讲故事讲到七情上面，适当嘅时候又会停一停问小朋友问题，啲小朋友笑到卡卡声。而我发现其中一个系我个仔，佢望住人哋爸爸双眼闪闪发光，呢个表情我系从未见过。

无比较无伤害，今次我被彻底击败，个心穿咗个窿。我千辛万苦喺妈妈谷揾到呢个神级故事爸爸，把握机会请教佢，爸爸话佢最初其实都唔识讲故事，唯有睇书睇片学，佢推介由美国教育心理学家Grover J. Whitehurst提出嘅CROWD理论，我发现又几容易几work㖞！

CROWD互动阅读法

CROWD 理论其实是一种互动阅读的方法，以下系5个要素：
1. Completion (完整句子)：
畀孩子一个唔完整句子，等佢哋完成，例如《三只小猪》，当读到“狼出尽气力向第一只猪嘅稻草屋吹啊吹”，你可以停低问：你觉得跟住会发生咩事？

2. Recall (回忆内容)：
读完一个故事后，可以问孩子故事情节，帮佢哋回忆并加深印象，例如读完《白雪公主》后，你可以问：你仲记得白雪公主遇到几多个小矮人？佢哋系点样帮白雪公主？

3. Open-ended questions (开放性问题)：
问一啲无标准答案嘅问题，鼓励小朋友发挥想像力同表达能力，例如读《哈利波特》时，你可以问：如果你都可以进入霍格华兹，你最想学边种魔法？

4. Wh- questions (5个W问题)：
问一啲包含 who/what/where/when/why嘅问题，帮助孩子理解故事基本要素，例如读《爱丽丝梦游仙境》时，你可以问：爱丽丝系咩时候跌入兔子洞？佢喺洞里面遇到边个？

5. Distancing (拉近距离)：
将故事内容同孩子的真实生活联系起来，等佢更有共鸣，例如读完《彼得兔》后，你可以问：你有没有好似彼得兔一样，做过一啲顽皮嘅事呢？当时系咩情况？

我应用咗呢个理论之后，发现伴读时阿仔好有反应，我觉得应用喺幼稚园小朋友身上，非常有效。大家都系第一次做父母，有好多嘢会觉得我细个咪又咁咁咁，使乜学？但呢个年代养育一个小朋友，真系好多学问。有时唔好怪小朋友唔钟意睇书，反而问下自己，系咪成日喺小朋友面前玩手机呢？

Eric爸爸
80后两孩爸爸，被誉为“神队友”，最钟意同大家交流仔女经。

书展买得精明仲要讲得聪明 学识互动阅读法 培养爱阅读小孩

书展买得精明仲要讲得聪明学识互动阅读法培养爱阅读小孩